सिड्नीमा किलोमिटर घटाएर कार बेच्ने गिरोह सक्रिय

सिड्नी । के तपाँई सिड्नीमा प्रयोग गरिएका कार, किन्दै हुनुहुन्छ ? यदि त्यशो हो भने तपाँई विशेष तरिकाले सजग हुनुपर्ने अवस्था सिर्जना भएको छ । अस्ट्रेलियाको मुख्य शहर सिड्नीमा धेरै गुडेका कारहरुको किलोमिटर घटाएर धमाधम बिक्री गर्ने गिरोह सक्रिय रहेको पाईएको छ ।

अवैध रुपमा किलोमिटर घटाउँदै, सर्वसाधारणलाई सस्तो मुल्यमा बेच्ने जनगुनासो बढेपछि न्यू साउथ बेल्सको फेयर ट्रेडिङले विभिन्न स्थानमा छापा मारेको छ । पछिल्लो एक महिनामा त्यसरी, अवैध तरिकाले किलोमिटर घटाएर बेच्ने २८ जनालाई जरिवाना गरिएको फेयर ट्रेडिङले जनाएको छ । त्यसमध्ये एकजनालाई अदालतमा मुद्दा दर्ता गरिएको बताईएको छ ।

व्यक्तिगत देखि डिलरहरुले समेत लुकीछिपी किलोमिटर घटाएर बेच्ने गरेको जनगुनासो निकै व्यापक बनेको यहाँका सञ्चारमाध्यमहरुले जनाएका छन् । सिड्नीमा कारको सेकेन्ड ह्यान्ड मार्केट, निकै राम्रो रहेको छ । अन्तराष्ट्रिय विद्यार्थीहरुको सँख्या अत्यधिक भएकोले पनि उनीहरुले नयाँ भन्दा सस्तो मुल्यमा सेकेन्ड ह्याण्ड कार खरिद गर्ने गरेका छन् । त्यसमा साथै मध्यम आय भएकाहरु पनि नयाँ भन्दा प्रयोग भइसकेको कारमा बढी जोड दिने गरेका छन् । अञ्जान ग्राहकहरुलाई गुमराहमा पार्ने, त्यस्तो गिरोहबारे सूचना र जानकारी दिन समेत फेयर ट्रेडिङले आब्हान गरेको छ ।