मेलबर्न। अस्ट्रेलियाको मुख्य शहर मेलर्बनमा मार्च १५ तारिखमा हुने नेपाल फेस्टिभलको तयारी तीब्र पारिएको छ । गैरआवासीय नेपाली सघंघ भिक्टोरिया राज्यको सयोजनमा हुने फेस्टिभलको आन्तरिक तथा बाह्य तयारीलाई व्यापक बनाईएको छ । विभिन्न उपसमितिहरु मार्फत नेपाली चिनाउने पर्वको रुपमा रहेको फेस्टिभललाई भव्य रुपमा अघि बढाईएको आयोजकले जनाएको छ । यसपटकको नेपाल फेष्टिभलमा कन्दरा व्याण्ड मुख्य आकर्षणको रुपमा रहनेछ ।
कन्दरा व्याण्डका गायक विवेक श्रेष्ठका लागि मेलबर्न विशेष छ, किनकि उनले यहीँ घरजम गरे । पहिले घरदेश अनि परदेश भन्ने नाराका साथ कन्दरा व्याण्डको वल्र्ड टुर गरिरहेका गायक विवेक श्रेष्ठलाई अष्ट्रेलियाका पाँच शहरका नेपाल फेष्टिभलहरुमा मुख्य व्याण्डका रुपमा सहभागी हुँदा जुन रोमाञ्चकता महसूस भइरहेको छ त्यसभन्दा फरक मेलबर्नको विषयमा उनी सोच्दछन् । उनले भने, ‘मेलबर्नसँग मेरो आफ्नै भावना छ । २०१६ को कन्सर्ट मेरो जीवनकै एउटा मोड थियो । जसले पक्कै पनि मलाई नोस्टाल्जिक बनाउँछ ।’
व्याण्डले घरदेशदेखि परदेशसम्म नारा नेपालको आन्तरिक पर्यटनलाई समेत प्रबद्र्धन गर्ने उद्देश्य राखेर तय गरेका थियो । यही नारा बोकेर नेपालका विभिन्न शहरमा, विश्वका विभिन्न कुनामा कन्सर्ट गरिरहेको कन्दराका गायक श्रेष्ठ भन्छन् , ‘मेलबर्न आइपुग्दा त मलाई परदेश होइन घरदेश भन्ने भावना आउँछ होला ।’फेडेरेसन स्क्वायरमा नेपाल फेष्टिभल हुनुअघि गरिने परेडमा पनि सहभागी हुने तयारी गरेका गायक श्रेष्ठको साथमा कन्दरा व्याण्डका ८ जना सदस्य सहभागी हुनेछन् । कन्दराले ९ वर्षपछि फेरि अष्ट्रेलियाको नेपाल फेष्टिभलमा आफ्नो प्रस्तुति दिँदैछ । उनलाई ड्रममा सुनील थापा, गिटारमा देव लामा, बेस गिटारमा दयाबाबु झा, मादलमा अविनाश गायक, किबोर्डमा उमेश थापाले साथ दिनेछन् ।
व्याण्डको क्यामेरा र ग्राफीक्स नवीन थापाले हेर्नेछन् भने निरब श्रेष्ठ साउन्ड ईन्जिनियरको रुपमा सहभागी हुँदैछन् । गायक श्रेष्ठ भन्छन् ‘नेपाल फेष्टिभलको आफ्नै गरिमा छ, दर्शक उपस्थितिको हिसाबले विशाल कार्यक्रम मध्ये पर्छ । फेरि हाम्रो गीत भुरादेखि बुढासम्म सबै जेनरेसनलाई मनपर्ने भएकोले कन्दरालाई नेपाल फेष्टिभल पर्फेक्ट हुन्छ भनेर नै हामीले सहभागिता निश्चित गरेका हौं ।’
अष्ट्रेलियाको नेपाल फेष्टिभलमा सहभागी भएपछि कन्दराले आफ्नो वल्र्ड टुरलाई निरन्तरता दिँदै अमेरिका र क्यानडा जाने तयारी छ । त्यसपछि जपानमा कार्यक्रम हुनेछ भने त्यसपछि बाँकी युरोप । यसअघि दुबई, कतार, हङकङ र लन्डनमा कन्दराको कन्सर्ट भइसकेको छ ।करिब २ वर्षको तयारीपछि नयाँ स्वरुपमा पुरानै मेलोडी बोकेर दर्शकश्रोतामाझ आएको कन्दराले नेपाल फेष्टिभलमा सबै उमेर समूहका दर्शकलाई आफ्ना गीत र संगीतमा झुमाउने प्रयास गर्नेछ । गायक श्रेष्ठले भने, ‘नेपाल फेष्टिभलको सबैभन्दा उत्साहजनक पक्ष भनेको यहाँ सबै उमेर समूहको दर्शक एकै ठाउँमा हुन्छन् । उनीहरु त्यहाँ देश सम्झिन आइपुग्छन् । हामी सांगीतिक रुपमा उहाँहरु सबैलाई नेपालका गाउँ ठाउँमा, कुना कन्दरामा डुलाउनेछौं ।’
© 2023. All rights reserved. Designed By: HK Web Services