नेपथ्यको अस्ट्रेलिया टुर घोषणा, चार शहरको मिति तय

सिड्नी । बहुचर्चित नेपाली लोक–रक व्याण्ड ‘नेपथ्य’ले अस्ट्रेलियामा साँगेतिक टुर गर्ने भएको छ । नेपाली साँगेतिक दुनियाँमा फरक पहिचान बोकेको नेपथ्यले सामाजिक सञ्जाल फेसबुक मार्फत आफ्नो अस्ट्रेलिया टुर घोषणा गरेको हो ।

अध्ययन र रोजगारका लागि नेपालीहरुको आकर्षक मन्तव्य मानिएको अस्ट्रेलियामा पछिल्लो समय नेपाली साँगेतिक व्याण्डहरु आउने क्रम तीब्र बनेको छ । नेपथ्यले अस्ट्रेलियाको सबै शहरमा आफ्नो प्रस्तुती दिने जनाईएपनि पहिलो चरणमा ४ वटा शहरमा मिति तय भएको छ । जस अनुसार, मार्च ९ मा पर्थ, मार्च १४ मा ब्रिसबेन, मार्च २१ मा एडिलेड र मार्च २९ मा सिड्नीमा कन्सर्ट हुनेछ ।

चारै शहरका लागि टिकट पनि खुल्ला भइसकेको छ । नेपथ्यले सबै शहरमा फरक–फरक इभेन्ट कम्पनीहरुसँग सहकार्य गरेर कन्सर्ट आयोजना गरिएको जनाएको छ । ‘अन्य शहरहरुको मिति पनि छिट्टै घोषणा गर्नेछौँ’, नेपथ्यले भनेको छ । सिड्नी कन्सर्टका लागि पहिलो चरणमा खोलिएको सबै टिकटहरु सोल्डआउट भइसकेको स्थानीय आयोजकले जनाएको छ । मोर पार्कस्थित हारडन पेभेलियनमा हुने कन्सर्टलाई टिआरएन इभेन्टसले व्यवस्थापन गर्ने जनाएको छ ।