सिड्नी । अस्ट्रेलियाको मेलर्बनमा भव्य रुपमा छठ पर्व मनाईने भएको छ । मधेशी कम्यूनिटी अफ भिक्टोरियाले नेपालको तराई क्षेत्रमा विशेष रुपले मनाईने छठ पर्व यसबर्ष नोम्भेबर ७ र ८ तारिख मेलर्बनमा धुमधामका साथ मनाउन लागेको हो ।

मेलर्बनमा रहेको अस्ट्रेलियन नेप्लिज मल्टीकल्चरल सेन्टरमा छठको विधीबिधान अनुसार पर्व मनाईने मधेशी कम्यूनिटी अफ भिक्टोरियाका सञ्चार संयोजक सञ्जिब जैसवालले जानकारी दिए ।

सो अवसरमा पुजापाठ, साँस्कृतिक कार्यक्रम, बालबच्चाको विशेष प्रस्तुती र प्रसाद ग्रहण जस्ता कार्यक्रम राखिएको छ । विगत केहि समयदेखि अस्ट्रेलियाको विभिन्न राज्यमा रहेका नेपालीहरुले विभिन्न संघसंस्थाको सहयोगमा छठ पर्व मनाउने परम्पराको सुरुवात गरेका छन् । संयोजक जैसवालले कार्यक्रममा उपस्थितका लागि सबैमा आग्रह गरेका छन् ।