सिड्नीको पशुपति बौद्ध तपोधाममा गणेशको मुर्ति अनावरण

सिड्नी । अस्ट्रेलियाको सिड्नीस्थित लिन्डहर्ष्टमा अवस्थित पशुपति बौद्ध तपोधाममा भगवान् गणेशको मुर्ति अनावरण गरिएको छ । गैरआवासीय नेपाली संघ (एनआरएनए) अस्ट्रेलियाको स्टुडेन्ट सपोर्ट समितिले केहि समयअघि सिड्नीको अर्वनमा आयोजित योग एवम् ध्यान शिविरबाट बचत भएको रकमले तपोधाममा मुर्ति सहयोग गरेका हुन् ।

हाशिवरात्री पर्वको अवसरमा आयोजित मुर्ति अनावरण कार्यक्रमको अवसरमा ध्यान शिविर पनि सञ्चालन गरिएको थियो । दुईदिन सम्म सञ्चालनको भएको शिविरमा विभिन्न किसिमका योग, साधना र पूजाआर्चना गरिएको आयोजकले जनाएको छ । स्टुडेन्ट सर्पोट समितिका संयोजक बद्री बरुवालले पवित्र धाममा सामाजिक कार्यबाट समेत सहयोग गर्न पाउँदा खुशी लागेको बताए ।

आफ्नोपन र आफ्नो गौरव सजाउंदै नेपाली झण्डा फहराउंने अष्ट्रेलियाकै पहिलो नेपाली मन्दिर, तपोधाम र गौशाला “पशुपति बौद्ध तपोधाम योग तपस्या र साधनाको अतिरिक्त विवाहको लागि समेत आकर्षक केन्द्र बन्दै गएको व्यवस्थापक सुरज समुहले बताएका छन् । कार्यक्रममा आचार्य राजन शर्मा योगिले योग, ध्यान र तपस्याका बारेमा जानकारी दिदै मुर्ति सहयोग गरेकोमा एन आर एन स्टुडेन्ट सपोर्ट समितिलाई आभार प्रकट गरेका थिए ।