नेदरल्यान्ड्सले आइसिसी विश्वकपमा १२ वर्षपछि स्थान बनाएको छ । जिम्बावेमा जारी आइसिसी विश्वकप छनोटमा नेदरल्यान्ड्सले स्कटल्यान्डमाथि चार विकेटको सानदार जितका साथ २०११ पछि विश्वकपमा स्थान बनाएको हो ।
२०११ को विश्वकपमा नेदरल्यान्ड्सले सबै ६ हारेको थियो । त्यस्तै सन् १९९६ मा सबै खेल हार्दा २००३ र २००७ मा एक एक खेल जितेको थियो । २००३ मा नामिबिया र २००७ मा स्कटल्यान्डलाई हराएको थियो ।
नेदरल्यान्ड्स आइसिसी विश्वकप सुपर लिगमा शीर्ष आठमा पर्न नसकेपछि विश्वकप छनोट खेल्नु परेको थियो । सुपर लिगमा नेदरल्यान्ड्स प्रतिस्पर्धा गर्ने एक्लो एसोसिएट टोली थियो । नेदरल्यान्ड्सले २०१५–१७ को विश्व क्रिकेट च्याम्पियनसिप जितेको कारण १२ टेस्ट टोलीसँग खेल्ने अवसर पाएको थियो ।
सुपर लिगमा भने नेदरल्यान्ड्स पुछारमा रहेर छनोट खेल्न आएको थियो । काउन्टीको कारण आफ्ना प्रमुख ८ खेलाडी विनानै छनोट खेल्न आएको थियो । बास डि लिडे, लोगन भान बिक र स्कट एडवार्ड्स हिरो बन्दा विश्वकपमा स्थान बनाएको हो ।
नेदरल्यान्ड्सलाई विश्वकपमा पुग्न समूह चरणमा वेस्टइन्डिजसँगको खेल निर्णायक जस्तै बन्यो । वेस्टइन्डिजले दिएको ३ सय ७५ रनको विशाल लक्ष्य नेदरल्यान्ड्सले अन्तिम बलमा टाई गरेको थियो । सुपर ओभरमा लोगन भान बिकले जेसन होल्डरलाई ३० रन प्रहार गरेपछि महत्वपूर्ण २ अंक पाएको थियो । सुपर सिक्समा ओमान र स्कटल्यान्डसँगको जितले विश्वकप यात्रा पक्का गराएको हो ।
उता नेदरल्यान्ड्सले समूह चरणमा अमेरिकालाई ५ विकेट, नेपाललाई ७ विकेट र वेस्टइन्डिजलाई सुपर ओभरमा हराएको थियो । जिम्बावेसँग ६ विकेटले पराजित हुन पुगेको थियो ।
सुपर सिक्समा श्रीलंकासँग २१ रनले पराजित हुँदा ओमानलाई डकवर्थ लेविस पद्धतिको आधारमा ७४ रनले हराएको थियो । नेदरल्यान्ड्सले उपाधिको लागि श्रीलंकासँग खेल्नेछ । श्रीलंकालेपनि विश्वकपमा स्थान बनाएको छ ।
© 2023. All rights reserved. Designed By: HK Web Services
